Oe, 21 de freàrgiu de su 2022, sa Die de sa limba materna si nch’est morende in mesu a su mudìmene issurdadore de sa Regione sarda.
No un’eventu, no una decraratzione, nemmancu unu comunicadu rituale che a su de s’annu coladu in ue Solinas faeddaiat de «pietra miliare». Pòbera cussa pedra, si est a li pònnere mente.
Ma sigomente cussa pedra sighit a lùghere – mancari sa preitza de chie la mentovat de badas – sa pedralana est in cussos faeddos ebbia.
Naraiat Solinas un’annu a oe chi s’Istatutu galu non cuntemplaiat una norma in contu de limba e chi bi cheriat unu cuadru normativu nou. E si oe Solinas no at naradu nudda est pròpiu ca su chi non fiat cuntempladu s’annu coladu no lu est nemmancu ocannu. E ca non bi nd’at de cuadru normativu nou.
De prus, s’annu coladu Solinas ligaiat sa chistione de sa limba a cussa tontesa de s’insularidade. Su gosu pro sa segunda, colada in Palazzo Madama, e su mudìmene pro sa prima nos narant ite est su chi l’interessat a su presidente de sa Regione.
Cheret chi su movimentu linguìsticu abbandonet cale si siat illusione e nche lasset a banda custos trasseris.
E chi sa die de sa limba materna siat cada die!
Liberu – Lìberos Rispetados Uguales